Алматы облысында алаяқтықтың сегіз фактісіне қатысы бар күдікті ұсталды, – деп хабарлайды Polisia.kz.
Қарасай ауданының тәртіп сақшылары бірнеше алаяқтық фактісіне қатысы бар 18 жастағы жас жігітті ұстады. Тергеу мәліметтеріне сәйкес, ұсталған адам сегіз эпизодқа қатысы бар, ол жергілікті тұрғындардан алаяқтық жолмен ақша иемденген.
– Полицияға күдіктінің әрекетінен зардап шеккен азаматтардың арыздары түсе бастады. Жәбірленушілердің айтуынша, капиталды ұлғайту сылтауымен жас жігіт олардан ақша алған. Ақша алғаннан кейін ол өз міндеттемелерін орындамай із-түзсіз жоғалып кеткен. Жалпы шығын бес миллион теңгеден асты, – деп атап өтті Қарасай аудандық полиция басқармасының бастығы Елзат Қанатұлы.
Полицейлердің жедел әрекеттерінің арқасында күдікті қысқа мерзімде анықталып, ұсталды. Қазіргі уақытта оған қатысты сегіз алаяқтықтың фактісі бойынша қылмыстық іс қозғалды.
– Біз алаяқтыққа тап болғандардың барлығын дереу полицияға хабарласуға шақырамыз. Келісім жасаған кезде әрдайым қырағы болыңыз және ақшаны бермес бұрын немесе бейтаныс адамдармен қаржылық қарым-қатынасқа түспес бұрын әрқашан ақпаратты тексеріңіз, – деді Е.Қанатұлы азаматтарға.
Күдікті қамауға алынды. Қазіргі уақытта оның басқа да осыған ұқсас қылмыстарға қатысы бар-жоғын тексеру жүргізілуде. Тергеу жалғасып жатыр.
