Ақтөбе полицейлері Республика күнін атап өтті, – деп хабарлайды Polisia.kz.
Полиция департаментінде ұйымдастырылған салтанатты шараның ресми бөлігінде марапаттау рәсімі жүргізілді. Ішкі істер министрі Ержан Саденовтің бұйрығымен бірнеше қызметкерге арнайы атақтар табысталды, сонымен қатар департамент басшысы Абай Жусупов мереке құрметіне орай қызметін абыройлы атқарып жүрген тәртіп сақшыларын төсбелгілермен, медальдармен, грамоталармен марапаттады.
Ұрпақтар сабақтастығы да назардан тыс қалған жоқ. Өзінің білімі мен тәжірибесін жас қызметкерлермен бөлісіп жүрген 5 аға буын ардагер марапатталып, отбасында алған игі тәрбиесін жұмыспен ұштастырып жүрген 3 жас полицейдің ата-аналары арнайы шақырылып, алғыс хаттар табысталды.
Одан әрі салтанатты бөлім концерттік бағдарламамен жалғасты, онда №13 орта мектептің полиция сыныбының хоры «Қазақстан – Отаным менің» және «Жас Ұлан» сияқты патриоттық әндерді орындады.
