Алматы облысында азаматтардың конституциялық құқықтарын қамтамасыз етуде кассациялық өндірістің маңызын талқылауға арналған дөңгелек үстел өтті, – деп хабарлайды Polisia.kz.
Бұл жиынға мамандандырылған тергеу сотының, прокуратураның, ұлттық қауіпсіздік комитетінің, полиция және экономикалық тергеу департаменттерінің өкілдері қатысты.
Кездесу барысында 2000 жылғы 25 желтоқсанда қабылданған “Сот жүйесі және судьялар мәртебесі туралы” Конституциялық заңға енгізілген соңғы өзгерістер мен толықтырулар жан-жақты қаралды.
Негізгі назар кассациялық өндіріс институтындағы өзгерістерге аударылды, себебі бұл институт әділдікке қол жеткізу құқығын қамтамасыз етуде маңызды рөл атқарады. Қабылданған жаңашылдықтар ашық және қолжетімді сот жүйесін қалыптастыруға бағытталып, конституциялық талаптарға толық сай келеді.
Қатысушылардың пікірінше, заңнамадағы осы өзгерістер Қазақстанның сот жүйесінің дамуына оң ықпал етіп, қоғамның әділдікке деген сенімін нығайта түседі.
