Абай облысында табиғат қорғау заңнамасын бұзушылар анықталды, – деп хабарлайды Polisia.kz.
Жаңа жыл қарсаңында Абай облысында өңірдің жасыл байлығын қорғауға бағытталған «Шырша» жедел алдын алу шарасы басталды. Полиция қызметкерлері табиғатты қорғау мекемелерімен бірлесіп, қылқан жапырақты ағаштарды заңсыз кесу, тасымалдау және сату фактілерін анықтау жұмыстарын белсенді түрде жүргізуде.
Үш күнде 34 рейд ұйымдастырылды. Рейд барысында анықталған кейбір алаңдатарлық жайттар анықталды. Семей қаласы маңында төрт қарағайды заңсыз кескен азамат ұсталды. Рейд кезінде орман алқабында дөңгелек ағаш кесінділері табылды.
Облыс орталығында жасыл желектерді зақымдағаны үшін үш адам әкімшілік жауапкершілікке тартылды. Олар саябақтағы шыршаның бұтақтарын сындырып, табиғатқа залал келтірген.
Аягөзде патрульдік полиция табиғатты қорғау бөлімімен бірлесіп, Шығыс Қазақстан облысынан заңсыз кесілген қылқан жапырақты ағаштардың бұтақтары тиелген жүк көлігін ұстады. Материалдар әрі қарай қарауға жіберілді.
Полиция қызметкерлері қылқан жапырақты ағаштарды заңсыз кесудің экологияға орасан зор зиян келтіретінін және мұндай әрекеттер үшін әкімшілік жауапкершілік қарастырылғанын ескертеді. Жаңа жыл қарсаңында табиғатқа қамқорлық танытып, оны келешек ұрпақ үшін сақтауға шақырамыз. Әрқайсымыздың саналы әрекетіміз жасыл орманымыздың болашағын қамтамасыз етеді.
