Қызылордада тергеу изоляторында сотталғандарға құқықтық сауаттылықты арттыру шарасы өтті, - деп хабарлайды Polisia.kz.
Қызылорда облысы бойынша Қылмыстық-атқару жүйесі департаментінің №68 мекемесінде сотталғандармен тәрбие және құқықтық түсіндіру жұмыстары тұрақты түрде жүргізілуде. Осы бағытта арнайы ұйымдастырылған кезекті шара мекеменің шаруашылық бөліміне қалдырылған сотталған азаматтарды қамтыды. Іс-шараға арнайы есепке алу бөлімінің бастығы Мерей Табылғанова мен тәрбие бөлімінің бастығы Азат Батырбеков жетекшілік етті.
Кездесудің негізгі тақырыбы Қазақстан Республикасы Қылмыстық кодексінің 72 және 73-баптары болды. Бұл баптар жазаны өтеуден шартты түрде мерзімінен бұрын босату және өтелмеген жаза бөлігін жеңілірек жаза түріне ауыстыру мәселелерін қарастырады.
Мекеме қызметкерлері сотталғандарға аталған баптардың талаптарын жан-жақты түсіндіріп, оларды қолдану тәртібі мен шарттарын егжей-тегжейлі баяндап берді. Сонымен қатар жазасын өтеушілердің өз құқықтары мен міндеттерін білуі олардың түзелу жолындағы маңызды қадам екені ерекше атап өтілді.
Кездесу барысында сотталған азаматтар тарапынан да көптеген сұрақтар қойылды. Олар шартты түрде мерзімінен бұрын босатудың нақты мерзімдері мен заңды рәсімдеріне, сондай-ақ тиісті баптарға сәйкес құжаттарды жинақтау тәртібіне қызығушылық танытты. Қызметкерлер барлық сұрақтарға толық әрі түсінікті жауап беріп, құқықтық сауаттылықты арттыруға бағытталған қосымша мәліметтер ұсынды.
Бұл шара мекеме әкімшілігінің сотталғандардың құқықтық мәдениетін арттыру, қоғамға оралуға ынталандыру және түзелу жолындағы оң қадамдарын қолдау бағытындағы жүйелі жұмыстарының бір бөлігі болып табылады. Мұндай кездесулер сотталғандардың құқықтық санасын нығайтып, олардың болашаққа деген сенімін арттыруға айтарлықтай ықпал етеді.
