Қостанай облысы бойынша Қылмыстық-атқару жүйесі департаментінің басшысы 2024 жылғы аумақтық бөлімшелердің жұмысын қорытындылауға арналған кеңес өткізді, - деп хабарлайды Polisia.kz.
Жиынға департамент бастығының орынбасарлары, жеке құрам өкілдері, ведомстволық бағынысты мекемелердің жедел, режимдік және тәрбие бөлімдерінің басшылары мен орынбасарлары қатысты.
Кеңес барысында алдағы жылға арналған басым бағыттар мен міндеттер айқындалды. Ең алдымен, мекемелердегі қауіпсіздік деңгейін арттыру, сотталғандарды оңалту жұмысының сапасын жақсарту, құқық қорғау органдарымен және қоғамдық ұйымдармен ынтымақтастықты нығайту мәселелеріне баса назар аударылды. Сонымен қатар бөлімшелердің қызметіне заманауи технологияларды енгізу қажеттілігі жан-жақты талқыланды. Бұл қадам жұмыс процестерін оңтайландыруға және басқару тиімділігін арттыруға ықпал ететіні атап өтілді.
Кеңесте жеке құрамның кәсіби құзыреттілігін дамытуға, моральдық-психологиялық тұрақтылықты нығайтуға және стресстік жағдайларда жұмыс істеу қабілетін жетілдіруге бағытталған оқыту іс-шараларының маңыздылығы да ерекше аталды.
Алға қойылған жоспарларды табысты жүзеге асыру келер жылы аймақтағы қоғамдық қауіпсіздік пен құқықтық тәртіп деңгейін арттыруға негіз қалайды. Кеңес қорытындысы бойынша барлық қатысушыларға нақты тапсырмалар беріліп, жүзеге асырылатын шаралардың тиімділігіне сенім білдірілді.
