Павлодарлық оқушылар полиция мұражайына саяхат жасады, - деп хабарлайды Polisia.kz.
Павлодар облыстық полиция департаментінің мұражайы оқушылар үшін ерекше танымдық саяхат ұйымдастырды. Бұл шара Б. Алтынсарин атындағы облыстық қазақ гимназия-интернатының шәкірттеріне арналды.
Мұражай қорында 1000-нан астам бірегей жәдігер сақталған. Олардың қатарында ішкі істер органдары қызметкерлерінің грамоталары, марапаттары, фотосуреттері, жеке заттары бар. Ұлы Отан соғысы кезеңіне тиесілі жәдігерлер ерекше құндылыққа ие. Мұражай қабырғасында ардагерлер жазған естеліктер мен өмірбаяндар сақталып, өскелең ұрпаққа жеткізіліп келеді. Сондай-ақ, қызметтік борышын өтеу кезінде қаза тапқан полиция батырларының өмір жолы туралы стендтер де оқушылардың назарын аударды.
Балалар үшін сирек кездесетін қару-жарақтар ерекше қызығушылық тудырды. Олар сүйікті жәдігерлеріне қол тигізіп, полиция қызметкерлеріне көкейіндегі барлық сұрақтарын қою мүмкіндігіне ие болды.
9-сынып оқушысы Әдия Қабиден алған әсерімен бөлісті:
– Бізге бәрі қатты ұнады. Мұражайда қызықты экспозициялар өте көп. Бұл – біздің аталарымыз бен арғы аталарымыздың өшпес естелігі. Сол ауыр кезеңдерді бастан өткерген барша жанға ризашылық пен мақтаныш сезіміміз еселеп артты. Мұндай экскурсиялар патриоттық рухты көтереді, - деді ол.
Полиция қызметкерлері мұндай шаралардың тәрбиелік мәніне тоқталды:
– Біздің мұражай есігі баршаға ашық. Мұнда Павлодар милициясының құрылу тарихымен, сирек экспонаттар және мұрағаттық құжаттармен танысуға болады. Өскелең ұрпақ үшін мұндай кездесулердің маңызы зор. Олар патриотизм мен Отанға деген сүйіспеншілікті тәрбиелейді, - деп ой қорытындылады.
Шара соңында мектеп оқушылары полиция қызметкерлеріне танымдық әрі мазмұнды экскурсия үшін шынайы алғыстарын білдірді.
https://youtube.com/shorts/AH-T3-mDlPc?si=PA9WHmNuIPWdjQmO
