Павлодар облысында сотталғандар ҚР еңбек сіңірген мәдениет қайраткерімен кездесті, - деп хабарлайды Polisia.kz.
Павлодар облысы бойынша ҚАЖ департаментіне қарасты № 45 мекемеде Қазақстан Республикасының еңбек сіңірген мәдениет қайраткері, “Құрмет” орденінің иегері, Ж. Аймауытов атындағы қазақ музыкалық-драмалық театрының артисті Шәнім Бейбіт Керімұлымен кездесу өтті.
Бұл шара 2023-2025 жылдарға арналған ҚАЖ мекемелеріндегі ахуалды жақсарту жөніндегі Жол картасын жүзеге асыру жоспары аясында ұйымдастырылды. Кездесудің мақсаты — сотталғандармен тәрбие және профилактикалық жұмыстар жүргізу, олардың рухани және мәдени деңгейін арттыру. Кездесу барысында Бейбіт Шәнім өз кәсіби жетістіктері, театрдағы еңбек жолы және мәдениеттің адам өміріндегі маңызы туралы айтып, сұрақ-жауап сессиясын өткізді.
Бұл шара ҚАЖ мекемелеріндегі ахуалды жақсарту бойынша атқарылып жатқан жұмыстардың маңызды кезеңі болды, сондай-ақ сотталғандар мен мәдениет қайраткерлері арасында байланысты нығайтуға, олардың ресоциализациясына және қоғамға оралуына ықпал етті.
