Полиция қызметі – тек қылмыспен күресіп, қоғамдық тәртіпті қамтамасыз етумен шектелмейді. Бұл – тәрбиелік жұмыс, моральдық құндылықтарды қалыптастыру, қызметтік борышқа адалдық пен заңға деген құрмет. Ішкі істер органдарының идеологиялық және тәрбиелік жұмысы осылардан басталады. Алматы облыстық полиция департаментінің тәрбие және кадрлық жұмыс басқармасы бастығының орынбасары Жанар Көптілеуова осы бағытқа жетекшілік етеді. Ол туралы Polisia.kz сайты аз-кем әңгімелеп береді.
Ішкі істер органдарындағы қызметін 2003 жылдан бастап бастаған Жанар Абайқызы тек кәсіби дамумен айналысып қана қоймай, жаңа буын қызметкерлерін тәрбиелеуге де ерекше көңіл бөлді. Оның қызметтік жолы бірнеше маңызды бағытты қамтиды. Кәмелетке толмағандар ісі жөніндегі инспекцияда жұмыс істеп, қиын жағдайға тап болған жасөспірімдерге көмек көрсетті. Кинологиялық қызметте төрт аяқты көмекшілермен жұмыс істей отырып, тәжірибе жинақтады. Сонымен қатар, жергілікті полиция қызметі басқармасының штабын басқарып, көшедегі қауіпсіздікке жауапты бөлімшелердің жұмысын үйлестірді.
Бұл бай тәжірибе бүгінгі таңда Жанар Абайқызына жеке құрам арасында тәрбие және идеологиялық жұмыстарды тиімді ұйымдастыруға мүмкіндік береді. Оның пікірінше, нағыз полицей – тек кәсіби маман емес, адамгершілік ұстанымы жоғары, намысты, қоғам алдындағы жауапкершілікті сезінетін адам болуы керек.
– Полициядағы тәрбиелік жұмыс – қызметкерлердің кәсіби біліктілігінің негізі. Заңдарды білу жеткіліксіз, өз миссияңды терең түсіну маңызды – азаматтарды қорғау, әділдік пен адалдықтың үлгісі болу, – дейді Жанар Көптілеуова.
Оның жұмысы кең ауқымды міндеттерді қамтиды: жас қызметкерлерге патриоттық тәрбие беру, ішкі істер органдарының қоғамдағы оң имиджін қалыптастыру, ардагерлермен кездесулер ұйымдастыру, жеке құрам арасында моральдық-этикалық қағидаларды нығайту стратегияларын әзірлеу және жастар арасында мамандыққа деген мақтаныш сезімін тәрбиелеу.
Жанар Көптілеуова – тек тәжірибелі офицер, тәлімгер және басшы ғана емес, сонымен қатар аяулы ана. Ол қызметі мен отбасын үйлестіре отырып, кәсіби міндеттері мен жақындарына деген қамқорлықты қатар алып жүреді.
