Алматыда сотталған балалар мен студенттер арасында шағын футболдан жарыс өтті, - деп хабарлайды Polisia.kz.
Алматы қаласы бойынша ҚАЖ департаментінің №11 мекемесіндегі жазасын өтеуші жасөспірімдер мен Алматы қаласындағы колледж студенттері арасында шағын футболдан жолдастық кездесу ұйымдастырылды.
Жарысқа Алматы технология және флористика колледжінің "АКТИФ" командасы, Алматы сән және дизайн колледжінің "Акмис" командасы, Логистика және көлік колледжінің "ALT" командасы, сондай-ақ сотталған балалардан құралған "Жастар" командасы қатысты.
Шағын футбол жарысында "ALT" командасы бірінші орынды иеленсе, екінші орынға жазалы жасөспірімдерден құралған "Жастар" командасы лайықты болды.
Жарыс аяқталған соң мекеме бастығы А. Сүлейменов барлық командаларға сотталған балалардың қоғамда өз орындарын табуларына жігерлендіретін ойын өрнегін көрсеткендері үшін алғыс хаттар табыстап, жарыстың тәрбиелік мәні туралы сөз қозғады. Ол бұл жарыстың басты мақсаты футбол әлемдегі ең танымал топтық ойын ретінде балаларды ұйымшылдыққа үйрете отырып, салауатты өмір салтын насихаттау екенін атап өтті.
