Елімізде Солтүстік Қазақстан облысында "Назар аударыңыз – балалар!" республикалық акциясы өтуде. Шараның мақсаты – жазғы демалыс қарсаңында балалардың қатысуымен болатын жол-көлік оқиғаларының алдын алу, – деп хабарлайды Polisia.kz.
Жыл басынан бері өңір жолдарында балалар қатысуымен 28 жол апаты тіркелді. Салдарынан 32 бала әртүрлі дәрежедегі жарақат алды. Осыған байланысты полиция профилактикалық жұмыстарды күшейтті.
Акция аясында мектеп автобустарының техникалық жай-күйі тексерілуде. Әсіресе, алғашқы көмек қобдишасының, өрт сөндіргіштердің болуы, жарық шамдарының, тежеу жүйесінің дұрыстығы және салонның жалпы жағдайы басты назарда. Көп жағдайда елеулі бұзушылықтар анықталмаса да, мұндай тексерістер мектеп көлігінің дайындық деңгейін арттырып, балалардың қауіпсіздігін қамтамасыз етуге ықпал етеді.
Акция 26 мамырға дейін жалғасады. Полиция қызметкерлері ата-аналар мен ересектерге балалардың қауіпсіздігі – үлкендердің жауапкершілігі екенін ескертеді.
