Талдықорғанда полиция жол қауіпсіздігіне арналған акция өткізді, - деп хабарлайды Polisia.kz.
Талдықорғанда жол қозғалысы ережелерін бұзудың зардаптары туралы халықтың хабардарлығын арттыруға бағытталған профилактикалық акция өтті. Іс-шараны жергілікті полиция қызметі ұйымдастырып, жолдағы тәртіптің маңызын тұрғындарға ерекше тәсілмен жеткізді.
Акция барысында қала көшелеріндегі халық көп жиналатын орындарда жол-көлік оқиғасынан қатты зақымданған автокөлік эвакуаторға орнатылып көрсетілді. Бұл көрініс жүргізушілер мен жаяу жүргіншілерге жол ережесін елемеудің қаншалықты ауыр салдарға әкелетінін көзбен көру арқылы ұғындырды. Көпшілік бұл жантүршігерлік көрініске үлкен алаңдаушылықпен қарап, жолдағы жауапкершіліктің қаншалықты маңызды екенін түсінді.
Полиция қызметкерлері жол қозғалысына қатысушыларды аса мұқият болуға, жылдамдықты шектен тыс асырмауға және қауіпсіздік талаптарын қатаң сақтауға шақырды.
- Жол үстінде әрбір әрекет маңызды. Сіз тек өз өміріңізге ғана емес, өзгелердің де тағдырына жауаптысыз, – деп ескертті тәртіп сақшылары.
Мұндай акциялар жүргізушілер мен тұрғындардың санасында жолдағы қауіпсіздік мәдениетін қалыптастыруға, апат санын азайтуға және адам өмірін сақтауға бағытталған маңызды қадам.
