Жетісу облысында “Жас сақшы” кадеттері Шоқан Уәлихановтың мұражайына барды, — деп хабарлайды Polisia.kz.
Жетісу облысы полиция департаментінің қызметкерлері Ұлттық ұлан мен ішкі істер органдарының ардагерлерімен бірлесе отырып, “Жас сақшы” кадеттеріне арналған тағылымды әрі танымдық сапар ұйымдастырды. Жасөспірімдер қазақтың ұлы ғалымы, ағартушысы әрі офицері Шоқан Уәлихановтың ескерткішіне тағзым етіп, мұражайын аралады.
Сапардың басты мақсаты – тек тарихи тұлғамен таныстыру ғана емес, сонымен қатар өскелең ұрпақтың бойында патриоттық сезім, елге деген сүйіспеншілік, өз батырларына деген мақтаныш пен лайықты азамат болуға ұмтылыс қалыптастыру.
Экскурсия барысында кадеттерге Омбы әскери училищесінің түлегі, этнограф, тарихшы, саяхатшы Шоқан Уәлихановтың өмірі мен ғылыми еңбектері туралы кеңінен айтылды. Ерекше назар оның офицерлік ар-намысы мен мінсіз қызметіне, ғылым мен мәдениетке қосқан өлшеусіз үлесіне аударылды. Ұлы тұлғаның бейнесі халқына да, ғылым жолына да адал қызмет еткен нағыз зиялы азамат, шынайы патриот ретінде ұсынылды.
— Нағыз кадет дәл осындай болуға тиіс: білімді, әділетті, Отанға адал және қоғамға қызмет етуге дайын болуы керек, — деді ұйымдастырушылар жастарға үндеу тастап.
Бұл сапар жас кадеттерге терең әсер қалдырып, оларды білімге, өзін-өзі дамытуға және тәртіпті нығайтуға шабыттандырды. Осындай іс-шаралар болашақ құқық қорғаушыларды тәрбиелеуде, жоғары моральдық құндылықтарды сіңіруде маңызды рөл атқарады.
