Ұлттық ойындар күні қарсаңында Абай облысы бойынша ҚАЖД мекемесінде ерекше форматтағы спорттық шара өтті, - деп хабарлайды Polisia.kz.
Мекеме қызметкерлері сотталған азаматтар арасында Қазақстан халықтарының дәстүрлі мәдениетімен таныстыруға және салауатты өмір салтын насихаттауға бағытталған спорттық жарыс ұйымдастырды.
Түзеу мекемесінің аумағында өткен бұл шара жылы әрі достық ахуалда өтті. Арқан тарту, белбеумен күрес, армрестлинг сынды ұлттық спорт түрлері мен ептілік пен дәлдікке негізделген ойындарға 185 сотталған азамат белсенді қатысты. Жарысқа қатысушылар шынайы спорттық ынта мен командалық рухты паш етті.
Мекеме қызметкерлерінің айтуынша, мұндай шаралар тек дене белсенділігін арттырып қана қоймай, сонымен бірге тәрбиелік мәнге де ие. Олар қатысушыларға Қазақстан халықтарының бай мәдениеті мен дәстүрлерін таныту арқылы көпұлтты қоғамымызға деген құрмет пен толеранттылықты қалыптастыруға ықпал етеді.
Жеңімпаздар мен жүлдегерлер арнайы дипломдармен және мекеме әкімшілігі тағайындаған естелік сыйлықтармен марапатталды.
– Мұндай іс-шаралар сотталғандарға өздерін елдің мәдени мұрасына қатыстымыз деп сезінуге мүмкіндік береді. Спорт пен мәдени бағдарламалар олардың қайта әлеуметтенуіне оң әсер етеді, – деді мекеме бастығының тәрбие жұмысы жөніндегі орынбасары Айдын Қалелов.
Ұлттық ойындар күнін атап өту жазаны өтеу орындарында тәрбиелік және ағартушылық жұмыстың жарқын үлгісіне айналды. Шектеулі еркіндік жағдайында да рухани және физикалық дамуға мүмкіндік бар екенін дәлелдеді.
