Атырау облысында Конституция күні қарсаңында полицейлер марапатталды, - деп хабарлайды Polisia.kz.
30 тамыз – Қазақстан Республикасының Конституциясы күніне орай Атырау облысы полиция департаментінде салтанатты жиын өтті. Шара барысында қызметтік міндеттерін адал атқарып, жоғары кәсіби нәтижелерге қол жеткізген қызметкерлер ҚР Ішкі істер министрі, полиция генерал-лейтенанты Ержан Саденовтың бұйрығымен "Құқық тәртібін қамтамасыз етуге қосқан үлесі үшін" медалімен және Құрмет грамоталарымен марапатталып, арнайы атақтарға ие болды.
Сонымен қатар, бірқатар қызметкерлер мен ішкі істер органдарының құрметті ардагерлері Атырау облысы полиция департаменті бастығының грамотасы мен алғыс хаттарын, сондай-ақ облыс әкімінің алғыс хаттарын алды.
Салтанатты жиында сөз сөйлеген Атырау облысы полиция департаментінің бастығы Нұрхат Оразбаев:
– Ата Заңымыз – еліміздің құқықтық іргетасы әрі тәуелсіздігіміздің берік тірегі. Ішкі істер органдарында ұзақ жылдар еңбек етіп, құқық қорғау саласында үлгі болған ардагерлердің еңбегі – ерекше құрметке лайық. Біздің басты міндетіміз – Конституция талаптарын бұлжытпай сақтап, елдегі заңдылық пен тәртіпті қамтамасыз ету. Бұл – баршамызға жүктелген абыройлы да жауапты іс. Баршаңызды Конституция күнімен шын жүректен құттықтаймын! – деді.
