Елордалық полиция департаментінде Конституция күніне арналған салтанатты іс-шара өтті, - деп хабарлайды Polisia.kz.
Қазақстан Республикасы Конституциясының 30 жылдық мерейтойы қарсаңында Астана қаласы полиция департаментінде мерекелік салтанатты жиын ұйымдастырылды.
Полиция департаментінің бастығы Марат Төлебаев жеке құрамды мемлекеттік мерекемен құттықтап, тұрақтылықты, тәртіп пен заң үстемдігін қамтамасыз етудегі Конституцияның айрықша рөліне тоқталды.
– Қазақстан Республикасының Конституциясы отыз жыл бойы мемлекетіміздің берік тұғырына айналып, әр азаматтың құқықтары мен бостандықтарының сенімді кепілі болып келеді. Заң мен тәртіп салтанат құрған жерде халықтың мемлекеттік институттарға деген сенімі мен құрметі арта түседі. Бұл жауапты міндетті полиция қызметкерлері күн сайын абыроймен атқарып, елорда тұрғындары мен қонақтарының тыныштығын күзетуде, – деді Марат Төлебаев.
Іс-шара барысында қызметте ерекше көзге түскен полиция қызметкерлері ведомстволық наградалармен марапатталды. Олардың арасында "Құқықтық тәртіпті қамтамасыз етуге қосқан үлесі үшін" медалі, "Ішкі істер органдарының үздігі" төсбелгісі, сондай-ақ Ішкі істер министрлігінің Құрмет грамоталары, Алғыс хаттары және бағалы сыйлықтар бар.
Салтанатқа қатысқан ішкі істер органдарының ардагерлеріне де алғыс білдіріліп, құқықтық тәртіп жүйесін дамытуға қосқан үлестері мен жас буынды тәрбиелеудегі еңбектері ерекше аталып өтті.
