Жетісуда әскери қызметшілер есірткіге қарсы экспресс-тесттен өтті, - деп хабарлайды Polisia.kz.
Жетісу облысында полиция департаментінің есірткі қылмысына қарсы іс-қимыл басқармасы №5514 әскери бөлімінің әскери қызметшілерімен бірлесіп, есірткі айналымына байланысты құқық бұзушылықтардың алдын алуға бағытталған профилактикалық іс-шара өткізді.
Акцияға кинологиялық қызмет орталығының мамандары мен есірткі қылмысының алдын алу жөніндегі кеңестің мүшелері де атсалысты. Шара барысында әскери қызметшілер есірткі заттарын қолдануға арналған экспресс-тесттен өтті.
Ұйымдастырушылардың айтуынша, мұндай бастамалардың негізгі мақсаты – жастардың бойында есірткіге деген тұрақты теріс көзқарас қалыптастыру, сондай-ақ әскери ұжымдарда тәртіп пен құқықтық мәдениетті нығайту.
Өңірде атқарылып жатқан профилактикалық шаралар жүйелі түрде өткізіліп келеді. Полиция өкілдері тек мемлекеттік органдар мен қоғамның бірлескен күш-жігерінің арқасында ғана есірткі қылмысының деңгейін төмендетіп, жастарды құқыққа қайшы әрекеттерден қорғауға болатынын ерекше атап өтті.
