Павлодар облысы Ақсу қаласында ІІО ардагерлерімен салтанатты кездесу өтті, - деп хабарлайды Polisia.kz.
Ақсу қаласы полиция бөлімінің мәжіліс залында ұрпақтар сабақтастығын нығайту мақсатында ішкі істер органдарының ардагерлерімен салтанатты кездесу өтті. Іс-шараға қазіргі полиция қызметкерлері, бөлім басшылығы, сондай-ақ ұзақ жылдар бойы құқықтық тәртіп пен азаматтардың қауіпсіздігін қамтамасыз етуге өмірін арнаған зейнеткерлер мен ардагерлер қатысты.
Бөлім бастығының орынбасары Алмас Баймбет құттықтау сөз сөйлеп, ардагерлерге жанқиярлық еңбегі, кәсібилігі және антқа адалдығы үшін алғыс білдірді.
– Сіздер біздің қызметіміздің бастауында тұрдыңыздар, бүгінгі жетістіктердің іргетасын қаладыңыздар. Сіздердің тәжірибелеріңіз – баға жетпес мұра, – деді ол.
Кездесу барысында ардагерлер өз қызмет жолдарынан естеліктер айтып, кәсіби қиындықтар мен жетістіктер жайында бөлісті. Жас қызметкерлер оларды қызығушылықпен тыңдап, сұрақтар қойып, өмірлік кеңестері мен бағыт-бағдары үшін ризашылықтарын білдірді. Әсіресе патриоттық тәрбие мен ұрпақтар арасындағы сабақтастықтың маңызына ерекше назар аударылды.
Полицейлер ардагерлермен осындай кездесулердің ұжымдық рухты нығайтып, кәсіби дәстүр мен мамандыққа деген мақтаныш сезімін арттыратынын атап өтті.
Мұндай шаралар Ақсу қаласы полиция бөлімінде игі дәстүрге айналған. Олар ардагерлердің өткеннің ғана емес, қазіргі ұжымның да ажырамас бөлігі екенін еске салады. Олардың еңбегі полиция тарихында мәңгі сақталады, ал ардагерлерге құрмет көрсету – жас буынның абыройлы міндеті.
Ұрпақтар сабақтастығы – полиция қызметінің күші мен рухын айқындайтын берік көпір.
