Қостанай облысында ПД студенттерге профилактикалық акция өткізді, – деп хабарлайды Polisia.kz.
Іс-шара Ахмет Байтұрсынұлы атындағы Қостанай университетінде өтті. Аталған шараны есірткі қылмысына қарсы іс-қимыл басқармасы психикалық денсаулық орталығымен бірлесіп ұйымдастырды.
Акцияның мақсаты — психотроптық заттарды қолдануға байланысты ықтимал тәуекелдерді ерте анықтау, жастардың құқықтық сауатын арттыру және студенттер арасында тұрақты есірткіге қарсы ұстанымды қалыптастыру.
Іс-шара барысында қатысушыларға есірткі қолданудың салдары, қолданыстағы айыппұлдар мен қылмыстық жауапкершілік шаралары, сондай-ақ қолжетімді медициналық және психологиялық көмек қызметтері туралы ақпарат берілді. Әр студент анонимді экспресс-наркотест тапсырып, мамандарға сұрақ қойып, жеке кеңес алу мүмкіндігіне ие болды.
ЕҚҚІБ-ның жедел уәкілі Әсемгүл Ерденова жастар арасындағы профилактикалық жұмыстың негізгі бағыттардың бірі болып қала беретінін атап өтті.
– Біздің мақсат — тек есірткі қылмыстарын анықтау емес, оларды алдын алу. Жастар тәуекелдер туралы нақты ақпаратты неғұрлым ерте алса, қауіпті шешімдерден сақтану мүмкіндігі соғұрлым жоғары. Мұндай акциялар студенттерге өздерін толғандырған мәселелерді ашық талқылауға және мамандардан көмек алуға мүмкіндік береді, — деді ол.
Үшінші курс студенті мұндай бастамалардың маңызы туралы пікірін бөлісті.
– Бүгінгі таңда жастар көптеген азғырулар мен жалған ақпаратқа тап болады. Маманның нақты деректерді түсіндіруі өте пайдалы болды. Анонимді тест — өзіңді еш қорқынышсыз және айыптаусыз тексерудің жақсы мүмкіндігі, — деді ол.
Ұйымдастырушылар мұндай акциялардың алдағы уақытта да жалғасатынын атап өтті, себебі профилактика — жастарды қорғаудың және дені сау қоғам қалыптастырудың маңызды бөлігі.
Айта кетейік, жыл басынан бері өңірде есірткі қылмысына қарсы іс-қимыл басқармасы 390 есірткі қылмысын анықтады. Оның төртеуін кәмелетке толмағандар жасаған. Заңсыз айналымнан 300 келіден астам түрлі есірткі заттары, оның ішінде 6 келіден астам синтетикалық есірткі тәркіленді.
