Полицейлер жүргізушілерді Ақмола облысындағы қиын жол жағдайы туралы ескертеді, - деп хабарлайды Polisia.kz.
Ақмола облысында ауа райының нашарлауына байланысты (ұсақ қар, қатты жел, көктайғақ) 14 желтоқсан сағат 21:30-дан бастап республикалық маңызы бар автожолдарда қозғалыс шектеулері енгізілді.
Атап айтқанда:
-
Астана – Шідерті – Павлодар (16–200 км) және Астана – Қарағанды – Алматы (30–92 км) автожолдарында барлық көлік түрлерінің қозғалысы шектелді.
-
Астана – Петропавл автожолында (19–341 км) жүк көлігі мен қоғамдық көлік үшін шектеулер енгізілді.
-
Астана – Петропавл (Астана – Щучинск) және Астана – Қарағанды – Алматы (Жібек жолы кенті – Қарағанды облысының шекарасы) учаскелерінде максималды жылдамдық 80 км/сағаттан 60 км/сағатқа төмендетілді.
-
15 желтоқсан сағат 12:00-де Астана – Қабанбай батыр – Нұра – Теміртау автожолында (35–51 км) және Қабанбай батыр кентінің учаскесі – Қарағанды облысының шекарасы (16 км) учаскесінде қозғалыс шектелетін болады.
Өткен тәулікте полиция қызметкерлері 400-ге жуық көлік құралын жол бойында ертіп жүруді қамтамасыз етті.
Полиция жүргізушілерді өте мұқият болуға, жылдамдық режимін, жолдағы қашықтықты және жол белгілерінің талаптарын қатаң сақтауға, сондай-ақ ауа райы нашарлаған кезде мүмкіндігінше алыс сапарлардан бас тартуға шақырады.
