Алматыда полицейлер балалар үйінің тәрбиеленушілеріне жаңа жылдық мереке ұйымдастырды, - деп хабарлайды Polisia.kz.
Алматы қаласы полиция департаменті әкімшілік полиция басқармасының қызметкерлері қоғамдық полиция көмекшілерімен бірлесіп, қиын өмірлік жағдайдағы балаларға арналған орталыққа барды.
Жаңа жыл мерекесі қарсаңында тәртіп сақшылары тәрбиеленушілер үшін мерекелік іс-шара ұйымдастырып, балалардың жас ерекшелігі мен қажеттіліктерін ескере отырып, арнайы сыйлықтар дайындады. Сонымен қатар полиция қызметкерлері балалардың өздері әзірлеген жаңа жылдық бағдарламаға белсене қатысты.
Іс-шара барысында балалар концерттік нөмірлер ұсынып, өлеңдер оқыды, ән айтып, би композицияларын орындады. Олардың шынайылығы мен ашық көңілі көрермендерді ерекше әсерге бөледі. Мұндай кездесулер балаларға үлкендердің қамқорлығы мен жылуын сезінуге мүмкіндік береді.
Алматы қаласы полиция департаменті әкімшілік полиция басқармасының бастығы Серік Шумаев бұл шараның маңыздылығына тоқталып:
- Бұл балалар – тағдырдың ауыр сынағына тап болған, ата-ана мейірімінен айырылған бүлдіршіндер. Біз олардың әрқайсысына аз да болса қуаныш сыйлап, қолдау көрсетуді өзіміздің азаматтық борышымыз деп санаймыз. Әрбір бала махаббатқа, қамқорлыққа және бақытты балалық шаққа лайық. Мұндай қайырымдылық бастамалар ұжымымызда игі дәстүрге айналды. Біз үшін қоғамдық тәртіпті сақтау ғана емес, сондай-ақ қолдауды қажет ететін балаларға жанашырлық таныту да маңызды, – деді.
Полицейлер балалар үйінің тәрбиешілері мен педагогтарына қажырлы еңбектері, шыдамдылығы мен жан-жақты қамқорлығы үшін алғыс білдіріп, алдағы уақытта да ынтымақтастықты жалғастыруға дайын екендіктерін жеткізді.
Мерекелік кездесу жылы әрі көңілді атмосферада өтіп, балаларға қуаныш, шаттық және болашаққа деген сенім сыйлады.
