Абай облысында лаңкестік туралы жалған хабар берген азамат бас бостандығынан айырылды, – деп хабарлайды Polisia.kz.
Тергеу органдары мемлекеттік органдардың қызметін тұрақсыздандыруға, қоғамда дүрбелең туғызуға бағытталған кез келген әрекетке қатаң әрі қағидатты түрде тосқауыл қояды. Бұған Абай облысы полиция департаменті тергеу басқармасының тергеушісі Әділжан Шакеров жүргізген лаңкестік шабуыл дайындалып жатқаны туралы көрінеу жалған хабарлама фактісі бойынша қылмыстық іс айқын дәлел болды.
Сотқа дейінгі тергеу барысында 31 жастағы сотталған азамат Қазақстан Республикасы ІІМ ҚАЖК-нің №19 мекемесінде жазасын өтеп жүріп, Instagram әлеуметтік желісі арқылы Әзербайжан Республикасының Баку қаласындағы халықаралық әуежайда террористік акт дайындалып жатыр деген көрінеу жалған ақпарат таратқаны анықталды.
Заңсыз иеленген ұялы телефонды пайдалана отырып, сотталған адам болжамды қауіптің нақты орнын және уақытын әдейі көрсеткен. Ол мұндай хабарламалардың құқық қорғау және арнайы қызметтердің ауқымды әрекет етуіне сондай-ақ халық арасында үрей туындауына әкеп соғатынын жақсы түсінген.
Жалған ақпараттың түсуіне байланысты шұғыл түрде полиция департаментінің, Ұлттық қауіпсіздік комитетінің және түзеу мекемесі әкімшілігінің күштері жұмылдырылды. Жүргізілген іс-шаралар нәтижесінде хабарламаның көзі жедел анықталып, ондағы мәліметтердің шындыққа сәйкес келмейтіні толықтай жоққа шығарылды.
Қылмыстың барлық мән-жайын анықтауда тергеуші Әділжан Шакеровтың қағидатты әрі жоғары кәсіби ұстанымы шешуші рөл атқарды. Қысқа мерзім ішінде ол дәлелдемелердің толық кешенін жинады. Телефондар алынып, тексерілді, куәгерлер мен күдіктінің өзі жауапқа тартылды.
Хабарламаларда террорлық қауіп туралы тікелей мәлімдемелердің бар екенін растаған сот-психологиялық сараптама тағайындалды. Тергеу барысында ер адамның қасақана әрекет еткені, таратқан ақпараттың жалған екенін білгені, қоғамдық қауіпті салдардың туындайтынын алдын ала болжап сонымен қатар қоғамдық қауіпсіздікті және мемлекеттік органдардың қызметін қамтамасыз етудің белгіленген тәртібін өрескел бұзғаны анықталды.
Тергеу қорытындысы бойынша сотталғанның әрекеттері "Терроризм актісі туралы көрінеу жалған хабарлама беру" бабы бойынша сараланды. Сот қарауының нәтижесінде айыпталушыға 11 жылға бас бостандығынан айыру жазасы тағайындалды.
Ішкі істер органдары терроризм туралы жалған хабарламалардың "әзіл" немесе өзін көрсету тәсілі емес, қатаң қылмыстық жауапкершілік көзделген аса ауыр қылмыс екенін атап өтеді. Жазасын өтеу орнына немесе бұрынғы соттылығына қарамастан, мұндай әрбір фактке қатаң әрі қағидатты құқықтық баға берілетін болады.
Абай облысы ПД тергеу басқармасының тергеушісі Әділжан Шакеровтың кәсіби жұмысы құқыққа қайшы әрекеттердің дер кезінде жолын кесуге және қоғамдық қауіпсіздікке қол сұғуға қатысты жауапкершіліктің бұлтартпастығын қамтамасыз етуге мүмкіндік берді.
