Жетісу облысының ауылында учаскелік полиция пункті ашылды, - деп хабарлайды Polisia.kz.
Өтенай ауылдық округіне қарасты Ынтымақ ауылында тұрғындар үшін маңызды әрі қуанышты оқиға болды. Мұнда №9 учаскелік полиция пункті өз жұмысын бастады. Бұл бастама қоғамдық қауіпсіздікті нығайтып, құқық қорғау қызметтерінің халыққа қолжетімділігін арттыруға бағытталған нақты әрі маңызды қадам болып отыр.
Жаңа учаскелік пункт "халыққа жақын полиция" қағидаты негізінде ашылды. Аталған ұстаным полицияның тұрғындарға тек аумақтық тұрғыдан ғана емес, адами қарым-қатынас пен өзара сенім тұрғысынан да жақын болуын көздейді. Енді ауыл тұрғындарына аудан орталығына немесе қалаға сабылудың қажеті жоқ — күнделікті әрі өзекті мәселелерді өз ауылында шешуге мүмкіндік туды.
№9 учаскелік пункттің ашылуы азаматтардың өтініш-тілектеріне жедел ден қоюға, құқық бұзушылықтардың алдын алуға және профилактикалық жұмыстарды жүйелі түрде жүргізуге жол ашады. Учаскелік инспектордың тұрғындармен тұрақты байланыста болуы округтің ерекшеліктерін, өзекті мәселелері мен қажеттіліктерін тереңірек түсінуге мүмкіндік береді. Бұл, әсіресе, ауылдық жерлер үшін аса маңызды.
Ауыл тұрғындары үшін бұл нысан — жай ғана қызметтік ғимарат емес. Бұл — қауіпсіздікке, тыныш өмірге және ертеңгі күнге деген сенімнің нышаны. Полиция халыққа жақын болған сайын, қоғам мен құқық қорғау органдары арасындағы өзара сенім артып, серіктестік нығаяды. Ал қауіпсіздік ортақ жауапкершілікке айналады.
Ынтымақ ауылында учаскелік полиция пунктінің ашылуы — тәртіп пен азаматтардың әл-ауқатына деген қамқорлық нақты іспен, адамға бағытталған қадамнан басталатынын айқын көрсетеді.
