Абай облысы бойынша ҚАЖД қызметкерлері жалғызбасты зейнеткерлерге қолдау көрсетті, - деп хабарлайды Polisia.kz.
Абай облысы бойынша қылмыстық-атқару жүйесі департаментінің ең төменгі қауіпсіздік мекемесінің қызметкерлері "Біздің күшіміз — бірлікте" атты қайырымдылық акциясын өткізіп, өңірде тұратын жалғызбасты зейнеткерлерге атаулы көмек көрсетті.
Аталған бастама қылмыстық-атқару жүйесі қызметкерлерінің әлеуметтік жауапкершілігі аясында жүзеге асырылып, аға буын өкілдеріне деген шынайы қамқорлықтың көрінісіне айналды. Акция барысында бірінші кезекте қажетті азық-түлік тауарлары салынған себеттер дайындалып, зейнеткерлерге табысталды.
Жасы мен денсаулық жағдайына байланысты қосымша қолдауды қажет ететін жалғыз тұратын қарияларға ерекше назар аударылды. Мекеме қызметкерлері қарттардың үйлеріне арнайы барып, хал-жағдайын сұрап, тұрмыстық ахуалымен танысып, қажеттіліктерін білді. Көпшілігі үшін бұл кездесу тек материалдық көмек қана емес, жылы жүздесу мен шынайы әңгіме-дүкен құруға мүмкіндік болды.
Акцияның негізгі мақсаты — жалғызбасты қарт азаматтарға әлеуметтік қолдау көрсету, өзара көмек пен мейірімділік қағидаттарын нығайту, сондай-ақ қоғамда аға буынға деген құрметті қалыптастыру. Осындай шаралар гуманистік құндылықтарды дәріптеп, халық пен құқық қорғау органдары арасындағы сенімді арттыруға және ұжымның бірлігін күшейтуге ықпал етеді.
— Аға буынға қамқорлық жасау — баршамыздың ортақ міндетіміз. Біз тек қызметтік міндеттерімізді адал атқарып қана қоймай, өңірдің қоғамдық өміріне де белсенді қатысуды маңызды деп санаймыз. Жалғызбасты зейнеткерлерге қолдау көрсету — елдің дамуына үлес қосқан жандарға деген құрмет пен жанашырлықтың белгісі. Мұндай игі бастамалар алдағы уақытта да жалғасады, — деді мекеме бастығының орынбасары Рустем Берлибеков.
— Қазіргі уақытта біз үшін ең құндысы — көңіл бөлу мен жылы сөз. Үйге келіп, жағдайымызды сұрап, қолдау білдіргендеріңіз үлкен демеу болды. Қызметкерлерге қамқорлықтары үшін алғыс айтамын. Бізді ұмытпағандарыңызды сезіну — зор қуаныш, — деді зейнеткер.
Мекемеде атап өткендей, "Біздің күшіміз — бірлікте" акциясы ұжымның ұйымшылдығы мен әлеуметтік осал топтарға қолдау көрсетуге деген ұмтылысының айқын көрінісі болды.
Қызметкерлер алдағы уақытта да қайырымдылық және әлеуметтік жобаларға белсенді қатысып, қоғамдағы өзара көмек пен бірлікті нығайтуға үлес қосуды жалғастырады.
