Павлодар қаласындағы №39 жалпы орта білім беру мектебінің бірінші сынып оқушылары Павлодар облысы полиция департаменті бастығының орынбасары Сафуан Жампейсовпен кездесті, - деп хабарлайды Polisia.kz.
Кездесу мазмұнды да тағылымды өтті. Сафуан Жампейсов оқушылармен қауіпсіз мінез-құлық негіздері туралы әңгімелесіп, мектептегі тәртіп – болашақтағы жауапкершіліктің алғашқы баспалдағы екенін түсіндірді. Әсіресе мінез-құлық мәдениетіне ерекше мән берілді. Балалар нағыз қорғаушы тек форма киген жан ғана емес, сонымен қатар үлкендерді құрметтейтін, сабағын жақсы оқитын әрі әлсіздерге әрдайым көмек қолын созуға дайын азамат екенін ұқты.
Кішкентай тыңдаушылар әңгімеге белсенді қатысып, батырдың бойында қандай қасиеттер болуы керектігі жөнінде өз ойларын ортаға салды. Кездесу жылы әрі сенімді атмосферада өтті. Мұндай тағылымды басқосулар балаларға ерте жастан құқықтық тәртіптің маңызын түсінуге және дұрыс өмірлік ұстаным қалыптастыруға ықпал етеді.
Сынып жетекшісі кездесуден кейін оқушылардың алған әсерлерімен ұзақ уақыт бөліскенін атап өтті. Бірінші сынып оқушылары қонақтың формасына, сондай-ақ олардың өздерімен үлкендерше байыпты сөйлескеніне ерекше тәнті болғандарын жарыса жеткізді. Көптеген оқушы осы әңгімеден кейін мектептегі тәртіп ережелеріне жаңаша көзқараспен қарай бастағандарын, әрбір ереженің түп-төркіні қауіпсіздік пен тәртіпке негізделгенін түсінгендерін айтты.
Балалар үшін ең әсерлі сәт – заң сақталуын күн сайын қамтамасыз ететін маманға өз сұрақтарын қою мүмкіндігі болды. Олар ерекше әсермен: "Бұл – ең керемет ерлік сабағы!" – деп қуана пікір білдірді. Кездесу кішкентай жүректерде мақтаныш сезімін оятып, жақсы үлгіге еліктеу ниетін қалыптастырды.
