Жетісу облысы полиция департаментінің қабырғасында “Заң мен тәртіп – қауіпсіз балалық шақтың кепілі” атты форум өтті, — деп хабарлайды Polisia.kz.
Іс-шараға білім беру жүйесінің өкілдері, құқық қорғау органдарының қызметкерлері, ата-аналар, тәлімгерлер мен педагогтар — яғни өскелең ұрпақтың болашағына бейжай қарамайтын жандар қатысты.
Аталған жиынның маңыздылығы — Қазақстан Республикасы Ішкі істер министрі Ержан Сәденовтің бастамасымен 2026 жылдың “Балаларды қорғау жылы” деп жариялануымен ерекшеленеді. Бұл бастама кәмелетке толмағандардың қауіпсіздігі мен әл-ауқатын қамтамасыз ету бағытындағы жұмысты күшейтуге серпін берді.
Форум барысында Жетісу облысы полиция департаментінің бастығы Сарқытбай Құсайынов сөз сөйлеп, профилактика мен қоғамның барлық институттарының өзара іс-қимылының маңыздылығын атап өтті.
— Тек бірге — мектеп, отбасы, қоғам және полиция — әрбір баланың өзін қауіпсіз, қорғалған әрі қажет сезінуіне мүмкіндік беретін орта қалыптастыра аламыз, — деді Сарқытбай Құсайынов.
Кездесу барысында қатысушылар профилактика тек ересектердің ғана емес, сонымен қатар саналы таңдау жасауды үйреніп келе жатқан балалардың да жауапкершілігі екенін атап өтті. Ата-аналар, педагогтар мен тәлімгерлердің қолдауымен балада дұрыс құндылықтар мен өмірлік бағдарлар қалыптасады.
Іс-шараның маңызды бөлігі — марапаттау рәсімі болды. Мұғалімдер, мектеп директорлары, оқу ісі жөніндегі орынбасарлар, тәлімгерлер мен ұстаздар балаларды тәрбиелеу мен олардың қауіпсіздігін қамтамасыз етуге қосқан үлесі үшін марапатталды. Олардың күнделікті еңбегі — көбіне көзге көрінбейтін, бірақ аса маңызды жұмыс — қауіпсіз әрі салауатты қоғамның негізін қалайды.
Форум тағы бір маңызды шындықты көрсетті: қауіпсіз балалық шақ өздігінен қалыптаспайды. Оның артында ел болашағына жанашырлықпен қарайтын адамдардың еңбегі жатыр. Тек бірлескен күш-жігер арқылы біз мәселелердің алдын алып қана қоймай, жауапты, саналы әрі лайықты ұрпақ тәрбиелей аламыз.
Заң мен тәртіп — әрқайсымыздың назарымыздан, қатысуымыздан және жауапкершілігімізден басталады. Ал мектеп, отбасы және полицияның тығыз ынтымақтастығы ғана әрбір баланың өзін қауіпсіз сезінетін қоғам қалыптастыруға мүмкіндік береді.
