Ақтөбеде ардагер мерейтойына орай ҚАЖД қызметкерлері арасында волейбол турнирі өтті, - деп хабарлайды Polisia.kz.
Ақтөбе облысы бойынша қылмыстық-атқару жүйесі департаменті "Қазақстан ішкі істер органдары мен Ұлттық ұлан ардагерлері ұйымы — Ақтөбе облысы бойынша ҚАЖ ардагерлері ұйымы" қоғамдық бірлестігінің филиал төрағасы С. Баймағамбетовтің мерейтойына орай волейбол турнирін ұйымдастырды.
Спорттық шараға ҚАЖ департаментінің бөлімшелері қызметкерлері, сала ардагерлері және шақырылған командалар қатысты. Турнир достық бәсеке, ұйымшылдық және қылмыстық-атқару жүйесі ардагерлерінің көпжылдық еңбегіне деген құрмет рухында өтті.
Іс-шараның ашылуында ұйымдастырушылар С. Баймағамбетовтің ардагерлер қозғалысын дамытуға, буын сабақтастығын нығайтуға және жас қызметкерлерге патриоттық тәрбие беруге қосқан үлесін атап өтті. Қатысушылар мұндай спорттық кездесулер салауатты өмір салтын насихаттауға, ұжымдық бірлікті нығайтуға және қызметтің игі дәстүрлерін сақтауға ықпал ететінін жеткізді.
Жарыс қорытындысы бойынша жеңімпаздар мен жүлдегерлер дипломдармен және естелік сыйлықтармен марапатталды. Ұйымдастырушылар турнирге қатысқан барлық азаматтарға алғыс білдіріп, мерейтой иесіне зор денсаулық, амандық және қоғамдық қызметте табыс тіледі.
