Абай облысы полиция департаменті жазғы демалыс кезінде балалардың қауіпсіздігіне мұқият болуды ескертеді, - деп хабарлайды Polisia.kz.
Жазғы демалыс — балалар үшін ерекше қуанышқа, қызықты оқиғалар мен жарқын әсерлерге толы кезең. Оқу жылы аяқталғаннан кейін балалар таза ауада көбірек уақыт өткізіп, аулада ойнап, достарымен серуендеп, велосипед, самокат және ролик тебуге әуестенеді. Алайда дәл осы уақытта олардың қауіпсіздігіне ерекше көңіл бөлу аса маңызды.
Жаз мезгілінде балалардың көшеде, қоғамдық орындарда және жол бойында жүру уақыты артады. Сондықтан ата-аналар мен ересектер тарапынан тұрақты бақылау мен түсіндіру жұмыстары қажет. Балаларға жол қозғалысы ережелерін сақтаудың маңызын үнемі ескертіп отырған жөн. Жолдан тек жаяу жүргіншілер өткелі арқылы өту, бағдаршам белгілеріне назар аудару және жолға кенеттен жүгіріп шықпау — әр баланың күнделікті дағдысына айналуы тиіс.
Сонымен қатар балаларға бейтаныс адамдармен сөйлеспеу, олардың ұсыныстарына сенбеу және күмәнді жағдай туындаған кезде бірден ата-анасына немесе полиция қызметкерлеріне хабарлау қажеттігін түсіндіру маңызды. Қауіпсіздік ережелерін білу — баланы түрлі келеңсіз жағдайлардан қорғаудың тиімді жолы.
Жазғы уақытта балалар арасында велосипед, самокат және ролик тебу кең таралған. Осындай белсенді демалыс кезінде қорғаныс құралдарын пайдалану өте маңызды. Арнайы шлем, тізеқап және шынтаққап жарақаттың алдын алуға көмектеседі. Балаларға көлік жүретін жолға шықпау, адамдар көп жиналған жерлерде абай болу және қозғалыс кезінде телефон қолданбау қажеттігі ескертілуі тиіс.
Су айдындары маңындағы қауіпсіздік те назардан тыс қалмауы керек. Балаларды қараусыз суға жібермеу, тек рұқсат етілген орындарда шомылу және қауіпсіздік талаптарын сақтау — қайғылы жағдайлардың алдын алудың басты жолы.
Қарапайым сақтық ережелерін сақтау арқылы жазатайым оқиғалардың алдын алып, балалардың демалысын қауіпсіз әрі көңілді өткізуіне мүмкіндік жасауға болады. Балалардың қауіпсіздігі — баршамыздың ортақ міндетіміз.
Жаз мезгілі балаларға тек қуаныш, көтеріңкі көңіл күй мен ұмытылмас әсер сыйласын! Әр отбасының демалысы қауіпсіз әрі бақытты өтсін!
