Талдықорғандық жас жол инспекторлары жоғары дайындық деңгейін көрсетті, — деп хабарлайды Polisia.kz.
Талдықорған қаласындағы №9 орта мектеп базасында 13 мектептің командалары қатысқан жас жол инспекторларының қалалық слеті өтті. Іс-шараның негізгі мақсаты – балалар арасындағы жол-көлік жарақаттарының алдын алу, оқушылардың құқықтық сауаттылығын арттыру және жол қозғалысы қауіпсіздігі мәдениетін қалыптастыру.
Слет барысында қатысушылар жол қозғалысы ережелері бойынша білімдерін, алғашқы медициналық көмек көрсету дағдыларын, саптық дайындықтарын және жол қауіпсіздігі тақырыбындағы шығармашылық өнерлерін ортаға салды.
Байқау қорытындысы бойынша №29 орта мектептің жас жол инспекторлары жасағы үздік деп танылып, облыстық кезеңге жолдама алды.
Ұйымдастырушылар оқушылардың жоғары дайындық деңгейін және жол қауіпсіздігі мәселелеріне деген белсенді қызығушылығын атап өтті. Жеңімпаздар мен жүлдегерлер грамоталармен, дипломдармен және естелік сыйлықтармен марапатталды.
— Балалардың қауіпсіздігі – мемлекеттің басты басымдықтарының бірі, – деп атап өтті полицияның баспасөз қызметі.
Осындай іс-шаралар жас ұрпақтың жауапкершілігін арттырып, тәртіптілікке, сондай-ақ Жол қозғалысы ережелерін құрметтеуге тәрбиелеуге ықпал етеді.
