Павлодар облысында учаскелік полиция инспекторы ауыл тұрғынының жоғалған бір отар қойын тауып берді

Павлодар облысының Шарбақты ауданындағы Сосновка ауылының тұрғыны Петр Петрович учаскелік полиция инспекторы Игорь Солдатенкоға жоғалған малын жедел іздеп тауып бергені үшін шынайы ризашылығын білдірді, - деп хабарлайды Polisia.kz.

Жергілікті жайылымнан 117 бас қой жоғалып кеткен. Мал иесі бір тәулік бойы оларды өз күшімен іздегенімен, нәтиже болмаған. Уақыт жоғалтудың қауіпті екенін түсінген азамат таңертең ерте полицияға жүгінген.

Хабарламаны алған Шарбақты ауданының учаскелік полиция инспекторы  Игорь Солдатенко дереу іздестіру жұмыстарын ұйымдастырды. Отардың жүруі мүмкін бағыттарды анықтап, жедел іздеу шараларын жүргізудің нәтижесінде сол күні кешке барлық жоғалған қой шалғай жайылымдардың бірінен табылды. Мал түгелдей аман-есен заңды иесіне қайтарылды.

Ауыл тұрғыны полиция қызметкерінің кәсібилігі мен жауапкершілігін ерекше атап өтті.

— Учаскелік инспекторымызға жеделдігі мен өз ісіне деген адалдығы үшін үлкен алғысымды білдіремін. Қоңырау шалғаннан кейін ол бірден іске кірісіп, сол күні кешке барлық малым табылды. Көмегі мен мінсіз қызметі үшін шын жүректен рақмет, — деді Петр Петрович.

Полиция қызметкерлері азаматтарға мал жоғалған немесе ұрланған жағдайда уақыт оздырмай "102" арнасына хабарласу қажеттігін еске салады. Уақтылы берілген ақпарат жоғалған малды тезірек табуға және құқық бұзушылықтардың жолын дер кезінде кесуге мүмкіндік береді.