26 маусым – Халықаралық нашақорлыққа және есірткінің заңсыз айналымына қарсы күрес күніне орай ұйымдастырылған айлық шеңберінде Атырау облысы бойынша ҚАЖ департаментінің №79 мекемесінде сотталғандар арасында "Заң мен тәртіп" тақырыбында интеллектуалдық сайыс өткізілді, – деп хабарлайды Polisia.kz.
Қоғамның тұрақты дамуы мен азаматтардың қауіпсіз өмір сүруінің негізі – заң мен тәртіптің сақталуы. Заң талаптарын құрметтеу, құқықтық мәдениетті қалыптастыру және құқық бұзушылықтың алдын алу – кез келген мемлекеттің басты міндеттерінің бірі. Осы орайда мекемеде өткізілген іс-шара сотталғандардың құқықтық сауаттылығын арттыруға, олардың қоғам алдындағы жауапкершілігін сезіндіруге және салауатты өмір салтын насихаттауға бағытталды.
Интеллектуалдық сайыс бірнеше кезеңнен тұрды. Қатысушылар Қазақстан Республикасының заңнамасы, азаматтардың құқықтары мен міндеттері, есірткі қылмыстарының қоғамға тигізетін зияны мен оның құқықтық салдары жөніндегі сұрақтарға жауап беріп, білімдерін ортаға салды. Сонымен қатар логикалық тапсырмалар мен танымдық ойындар ұйымдастырылып, қатысушылардың ойлау қабілеті мен тапқырлығы сыналды.
Сайыс барысында сотталғандар заңды білу мен оны құрметтеудің маңызын терең түсіне түсті. Әсіресе, есірткіге тәуелділік пен оның заңсыз айналымының адам өміріне, денсаулығына және қоғамның қауіпсіздігіне тигізетін кері әсері туралы жан-жақты пікір алмасулар өтті. Қатысушылар өз ойларын еркін жеткізіп, құқықтық тәрбиеге қатысты көзқарастарымен бөлісті.
Мұндай іс-шаралардың басты мақсаты – жазасын өтеушілердің құқықтық санасын қалыптастырып қана қоймай, олардың болашақ өмірге деген көзқарасын өзгертуге ықпал ету. Заң талаптарын сақтау, қоғамдағы тәртіпті құрметтеу және салауатты өмір салтын ұстану – әрбір азаматтың міндеті екені тағы бір мәрте айтылды.
Шара қорытындысы бойынша үздік нәтиже көрсеткен қатысушылар марапатталып, белсенділік танытқан барлық азаматқа алғыс айтылды.
