Павлодар облысында полиция қызметкерлері кәмелетке толмағандармен профилактикалық әңгіме өткізді, — деп хабарлайды Polisia.kz.
Шарбақты ауданының полиция бөлімінің қызметкерлері жасөспірімдер арасында әкімшілік және қылмыстық құқық бұзушылықтардың алдын алуға бағытталған профилактикалық әңгіме өткізді.
Іс-шара барысында полиция қызметкерлері кәмелетке толмағандарға Қазақстан Республикасының қолданыстағы заңнамасының нормаларын, құқық бұзушылықтар мен қылмыстардың түрлерін, сондай-ақ оларды жасағаны үшін заңнамада көзделген жауапкершілікті түсіндірді.
Қоғамдық тәртіпті сақтау, буллингтің, бұзақылықтың, ұрлықтың, алкогольдік ішімдіктерді, темекі өнімдерін және есірткі заттарын тұтынудың алдын алу, сондай-ақ қоғамдық орындарда құқық бұзушылықтарға жол бермеу мәселелеріне ерекше назар аударылды. Сонымен қатар жасөспірімдерге қоғамдық орындардағы мінез-құлық қағидалары, заң талаптарын сақтаудың маңыздылығы және құқыққа қайшы әрекеттердің салдары түсіндірілді.
Полиция қызметкерлері кәмелетке толмағандарды өз әрекеттеріне жауапкершілікпен қарауға, айналасындағы адамдардың құқықтары мен заңды мүдделерін құрметтеуге шақырды. Осы бағыттағы профилактикалық жұмыстар жалғасуда. Оның негізгі мақсаты – жасөспірімдердің құқықтық сауаттылығын арттыру, құқық бұзушылықтардың алдын алу және кәмелетке толмағандардың қауіпсіздігін қамтамасыз ету.
