Павлодар облысы Тереңкөл ауданында пробация қызметі отбасын қолдау орталығымен және жергілікті атқарушы органдармен бірлесіп, есепте тұрған азаматқа өз үйіне су құбырын тарту мәселесін шешуге көмектесті, - деп хабарлайды Polisia.kz.
Екі жыл бойы ер адам қажетті құжаттарды рәсімдеп, су құбырын тартуға рұқсат ала алмаған. Құжаттарды рәсімдеудегі қиындықтар мен тиісті тәртіп туралы ақпараттың жеткіліксіздігі салдарынан ол қайда жүгіну керектігін білмеген.
Пробация қызметі аталған мәселені әлеуметтік сүйемелдеуге алды. Отбасын қолдау орталығы және уәкілетті органдармен бірлесіп, азаматқа қажетті рәсімдерді түсінуге, құжаттарды дайындауға және тиісті рұқсат алуға көмек көрсетілді. Нәтижесінде мәселе шешіліп, үйге су кіргізілді.
Бұл жағдай пробация қызметінің жұмысы белгіленген талаптардың сақталуын бақылаумен ғана шектелмейтінін көрсетеді. Оның маңызды бағыттарының бірі — қиын өмірлік жағдайға тап болған азаматтардың әлеуметтік бейімделуіне жәрдемдесу және олардың қоғамға қайта оралуына кедергі келтіретін мәселелерді шешуге көмектесу.
Ведомствоаралық өзара іс-қимыл азаматтардың мәселелеріне кешенді түрде қарап, нақты нәтижелерге қол жеткізуге мүмкіндік береді. Уақтылы көрсетілген қолдау тұрмыстық жағдайды жақсартып қана қоймай, азаматтың одан әрі әлеуметтік бейімделуіне де негіз қалайды.
Пробация — бұл тек бақылау мен жауапкершілік емес, сонымен қатар адамға алға қадам басып, жаңа өмір бастауға мүмкіндік беретін нақты көмек.
