Биыл Түркістан облысында жер қойнауын заңсызпайдаланудың 30 дерегі тіркелген, – деп хабарлайды Polisia.kz.
Бұл туралы Полиция департаменті Жергілікті полиция қызметі басқармасының аға инспекторы Нұрлан Тұмабаев айтты.
Құқық бұзушылық құралы ретінде пайдаланылған 43 техника, атап айтқанда, жеті экскаватор, 11 погрузщик және 25 жүк тасу көлігі заңды шешім қабылданғанша, уақытша айыптұраққа жеткізілген.
Естеріңізде болса, соңғы жылдары браконьерлердің қолынан қаза тапқан екі табиғат қорықшысы мен одан басқа да келеңсіз оқиғалар жиілеп кетті. Осыған орай биылдан бастап елімізде аңшылық пен балық аулау жай тәртіп бұзу емес, орта деңгейдегі қылмыс санатына енгізіліп, заң күшейтілді.
Жалпы жыл басынан бері алты ай ішінде оңтүстік өңірде 43 экологиялық қылмыс, 737 әкімшілік құқықбұзушылық анықталып, 6 722 282 теңге көлемінде айыппұл салынған.
Түркістан облысы Полиция департаменті Жергілікті полиция қызметінің табиғат қорғау полиция инспекторлары мүдделі мемлекеттік органдармен бірлесе отырып облыс аумағында экологиялық қылмыс пен құқықбұзушылықтардың алдын алу бағытында бірқатар мақсатты іс-шара ұйымдастырып, жүзеге асырды. Оның ішінде «Браконьер», «Нерест» ЖПІШ және «Қызғалдақ«, «Жер қойнауы» алдын алу іс-шаралары болып өтті.
Айта кетейік, Түркістан облысында 18 табиғат қорғау полиция инспекторы бар. Олардың бәрі де жергілікті тұрғындар арасында табиғат қорғау заңнамаларын бұзбау, бұзған жағдайда қылмыстық, әкімшілік жауапкершілікке тартылатындығы туралы түсіндіру жұмыстарын жүргізеді. Олардың мақсаты мен міндеті – табиғатты уәкілетті органдармен бірлесіп қорғау, браконьерліктің жолын кесу, экологиялық қылмыстың алдын алу, қоршаған ортаның бүлінбей, аман сақталуына үлесін қосу.
