Павлодар облысы Полиция департаментінде «Халық денсаулығы және денсаулық сақтау жүйесі туралы» Қазақстан Республикасының Кодексіне енгізілген өзгерістер туралы онлайн брифинг өтті, – деп хабарлайды Polisia.kz.
Павлодар облысының Полиция департаментінде полиция ведомствосы бастығының бірінші орынбасары Жасқайрат Қайыровтың қатысуымен Әкімшілік полиция қызметіне қатысты «Халық денсаулығы және денсаулық сақтау жүйесі туралы» Қазақстан Республикасының Кодексіне енгізілген өзгерістер туралы онлайн брифинг өтті. Бұл өзгерістер Денсаулық сақтау деңгейін жақсартуға, сондай-ақ республика тұрғындарының денсаулығын нығайтуға бағытталған.
Кодексте қазір «кальян», «кальянға арналған темекі», «кальян қоспасы» сияқты ұғымдар бекітілген. Сондай-ақ «темекі өнімдері» ұғымы кеңейтіліп, «қыздырылған темекі өнімдері, темекі, кальянға арналған темекі, кальян қоспасы, темекіні қыздыруға арналған жүйелер, сондай-ақ олар үшін сұйықтықты тұтынудың электрондық жүйелері» ұғымдары енгізілген.
Жасқайрат Қайыров заңнамаға жас шамасы бойынша жаңа шектеулер енгізілгенін айтты:
– Енді темекі мен темекі бұйымдарын, оның ішінде қыздырылған темекі бұйымдарын, кальянға арналған темекіні, кальян қоспасын, темекіні қыздыру жүйелерін, электронды тұтыну жүйелері мен олар үшін қолданылатын сұйықтықтарды 21 жасқа толмаған адамдарға сатуға тыйым салынады. Сондай-ақ, сатушы сатып алушыдан жеке басын куәландыратын құжатты талап етуі қажет, ал құжат болмаған жағдайда сатылмайды.
Кәмелетке толмаған адамдардың алкогольдік ішімдіктерді, темекіні және темекі бұйымдарын тұтынуына тыйым салынады. Тыйымды бұзғаны үшін жасөспірімнің ата-анасы мен өзге де заңды өкілдері әкімшілік жауапкершілікке тартылатын болады. Темекі өнімдерін көрсетуге және сату орындарында ашық орналастыруға да тыйым салынады.
Енді азаматтар теміржол және автовокзалдар, әуежайлар, теңіз және өзен порттары, Метрополитен станцияларынан темекі өнімдерін сатып ала алмайды. Сондай-ақ, өзгерістерге сәйкес, қоғамдық көліктерде кәмелетке толмаған балалар болған кезде, жабық аялдамаларда, жанармай құю станцияларында, балалар алаңдарында, жер асты өткелдерінде, сондай-ақ, көлік құралдарын күту кезінде, пойыздарда, көпшілік демалыс орындарында темекі шегуге болмайды.
Айта кету керек, 2020 жылдың басынан бастап темекі шегу ережелерін бұзған 1846 азамат әкімшілік жауапкершілікке тартылды, сату объектілерінің 39 иесі сатушылардың темекі өнімдерін кәмелетке толмағандарға сатқаны үшін жазаланды.
