Шымкентте Әйелдерді зорлық-зомбылықтан қорғау тобының инспекторлары семинар-тренингке қатысты, – деп хабарлайды Polisia.kz.
Шымкент қалалық Әйелдер кеңесінің ұйымдастыруымен “Әлеуметтік қызметтерді және көмекті көрсетудің интеграцияланған моделін дамыту” тақырыбында семинар-тренинг өтті.
Оған Шымкент қаласы Полиция департаментінің Әл-Фараби және Еңбекші аудандары Полиция басқармаларының әйелдерді зорлық-зомбылықтан қорғау тобының инспекторлары, қалалық денсаулық сақтау басқармасының өкілдері мен мектеп ұстаздары қатысты.
Түрлі сала өкілдері бас қосқан жиында қоғамдағы мұқтаж жандарға әлеуметтік көмек көрсету тетіктерін жетілдіру, отбасындағы қарым-қатынас, туындаған әлеуметтік шиеленістерді шешуге көмек беру туралы пікір алмасу өтті.
Іс-шарада сөз сөйлеген Әл-Фараби ауданы Полиция басқармасының әйелдерді зорлық-зомбылықтан қорғау тобының инспекторы Айгүл Қалиева республика көлемінде ұйымдастырылып жатқан “Зорлық-зомбылықсыз 16 күн” акциясының мақсаты туралы толығырақ түсіндіріп өтті.
– Еліміздің барлық аймағында 25 қараша мен 10 желтоқсан аралығында “Зорлық-зомбылықсыз 16 күн” кең көлемді акциясы өткізілуде. Оның мақсаты әйелдерге қатысты зорлық-зомбылықтың алдын алу және жолын кесу, ана мен баланы қорғау, қоғамдағы отбасының рөлін нығайту болып табылады, – деді Айгүл Айдарбекқызы.
Аталмыш акция аясында Әл-Фараби ауданы бойынша 12 әйелмен профилактикалық түсіндіру жұмыстары жүгізілген. Оның ішінде үш азаматша “Самғау сенімі”» дағдарыс орталығына жеткізілген.
