Полиция қызметкерлері көліктерден ұрлық жасаған күдіктіні ұстады, – деп хабарлайды Polisia.kz.
Криминалдық полиция қызметкерлері жедел-іздестіру іс-шараларын өткізу кезінде екі автомашинадан ұрлық жасаған 38 жастағы ер адамды ұстады.
Сауда өкілі ұрлық жасалғаны туралы полицияға арызданған. Тергеп-тексеру барысында дүкенге азық-түліктерді түсіріп жатқан кезде ер адам автомашинаның ашық қалған есігін пайдаланып, бір қорап шекілдеуікті ұрлап кеткені анықталды. 15 мың теңге тұратын ұрланған шекілдеуікті ол басқа азық-түлік дүкеніне өткізіп жіберген.
Күдікті бұрын автомашинаның ашық қалған есігін пайдаланып, салоннан 87 мың теңге тұратын «Huawei» маркалы ұялы телефонды ұрлап кеткен. Автомашинаның иесі ТҚС-ға келген және машинаны ашық қалдырған, осылайша ұрлық жасалған.
Қазіргі кезде күдікті ұсталып, жасаған іс-әрекетін мойындады. ҚР ҚК 188-бабы бойынша қылмыстық іс қозғалды. Ұсталған тұлғаның бұрын жасалған осы секілді қылмыстарға қатыстылығы анықталуда.
Автомашина иелерінің көбінесе есіктерін ашық қалдыруы ұрлықтың жасалуына әкеліп соғады.
Нұр-Сұлтан қаласының Полиция департаменті азаматтарға мұқият болуды, көліктің есік және терезелерін жауып отыруды ескертеді.
Егер де сіз осы секілді ұрлықтың құрбаны немесе куәсі болсаңыз тез арада полицияға хабарласыңыз.
