Маңғыстауда құқық қорғау қызметкерлері арасында спорттық жарыс өтті, – деп хабарлайды Polisia.kz.
5 қазан – қылмыстық іздестіру қызметкерлерінің төл мерекесі болып ресми түрде тойланып келе жатқанына биыл 103 жыл толды. Өз бастарын қауіп-қатерге тіге отырып, қылмысты ашу және қылмыскерлерді құрықтау таудай сабырлық пен төзімділікті, ер жүректілік пен батылдықты талап ететін қызмет саласы.
Осы мереке қарсаңында құқық қорғау органдары қызметкерлерінің арасында бірқатар спорттық шаралар ұйымдастырылды. Спорттық жарыстарда Криминалдық полиция басқармасы, Есірткіге қарсы іс-қимыл басқармасы, Айдауыл қызмет ротасы, сондай-ақ мамандандырылған күзет қызметі басқармасы қызметкерлері мен ардагерлер бақ сынасып, нәтижесінде жүлделі орындардың иегерлері атанды.
Бұл шараға қатысушы қызметкерлер гір тасын көтеру, шағын футбол, командалық арқан тарту, қол күресі «Армреслинг» ойындары бойынша жарысқа түсті.
Жарыстың ашылу салтанатында Қазақстан Республикасының туы көтеріліп, әнұраны орындалып, Полиция департаменті бастығының орынбасары Алтынбек Қалиев алғысөз сөйледі.
– Қылмыстық іздестіру саласы қызметкерлерін мерекемен құттықтай отыра, ауыр да қиын қызметтерінде сәттілік тілеймін, – деп тілек білдірді ол.
Жарысқа барлығы 15 команда, 128 қызметкер қатысты.
Командалық шағын футболда бірінші орынға Маңғыстау облысы бойынша МКҚБ құрама командасы ие болды, екінші орынға Ішкі істер органдарының ардагерлерінің құрама командасы иеленсе, ал үшінші ПД-нің АҚР құрама командасы.
Гір тасын көтеру сайысынан бірінші орын алған АҚР қызметкері Нұрдаулет Тыныбеков, екінші орын – Жаңаөзен қаласы ПБ бастығының орынбасары Жеңіс Алибеков, үшінші орын – ПД КПБ аға жедел уәкілі Ердаулет Ермаханбетов иеленді.
Қол күрес «Армреслинг» сайысынан I орын алған АҚР қызметкері Нұрлан Құрбанғалиев, II орын – Маңғыстау облысы МКҚБ қызметкерң Идрис Авазов, III орын – ПД ЕҚҚІҚБ аға жедел уәкілі Ғайса Алиев.
Командалық арқан тартудан бірінші орынға АҚР құрама командасы, екінші орынға ПД ЕҚҚіҚБ құрама командасы, үшінші орынға ПД КПБ құрама командасы ие болды.
Барлық жүлделі орын алған командалар және жеке номинациялар бойынша аталған қызметкерлео командалық дипломдармен, грамоталармен, ақшалай және бағалы сыйлықтармен марапатталды.
