Абай облысында полицейлер балалар лагерінде қауіпсіздік сабағын өткізді, - деп хабарлайды Polisia.kz.
Жазғы демалыс – балалар үшін қызықты оқиғаларға, жаңа достар табуға және жарқын әсерлерге толы ерекше кезең. Алайда демалыстың қауіпсіз әрі мазмұнды өтуі қауіпсіздік талаптарын сақтаумен тікелей байланысты. Осы мақсатта Абай облысының полицейлері Бесқарағай ауданындағы "Радуга" балалар сауықтыру лагерінде профилактикалық кездесу өткізді.
Іс-шараға Бесқарағай аудандық полиция бөлімінің кәмелетке толмағандар істері жөніндегі учаскелік полиция инспекторы Саят Оспанов қатысып, лагерь тәрбиеленушілерімен қауіпсіздік мәдениетін қалыптастыруға бағытталған мазмұнды әңгіме жүргізді.
Кездесу барысында оқушыларға жол қозғалысы ережелерін сақтау, қоғамдық орындардағы тәртіп, бейтаныс адамдармен қарым-қатынас жасау кезіндегі сақтық шаралары, интернет қауіпсіздігі және төтенше жағдайлар кезінде әрекет ету тәртібі түсіндірілді. Полицей нақты өмірден алынған мысалдарды келтіріп, қауіпсіздік ережелерін сақтаудың маңыздылығына ерекше тоқталды.
Балалар өздерін қызықтырған сұрақтарын қойып, құқықтық сауаттылық пен жеке қауіпсіздікке қатысты маңызды мәліметтер алды. Еркін форматта өткен кездесуде оқушылар белсенділік танытып, қауіпсіз өмір салтын ұстанудың мәнін тереңірек түсінуге мүмкіндік алды.
Кездесу барысында инспектор Саят Оспанов жасөспірімдерге үндеу жасап:
- Құрметті жас достар! Жазғы демалыс – тынығып қана қоймай, өздеріңізді дамытуға, жаңа білім мен әсер алуға мүмкіндік беретін тамаша кезең. Алайда қандай жағдайда да қауіпсіздік бірінші орында тұруы тиіс. Жол қозғалысы ережелерін қатаң сақтаңыздар, қоғамдық орындарда мәдениеттілік пен жауапкершілік танытыңыздар. Әрқайсыңыз өз өмірлеріңіз бен денсаулықтарыңыз үшін жауапты екендеріңізді ұмытпаңыздар. Қауіпсіздік ережелерін сақтау – өздеріңізге және жақындарыңызға деген қамқорлықтың белгісі. Жазғы демалыстарыңыз қызықты, жарқын әрі қауіпсіз өтсін, – деді.
Осындай профилактикалық іс-шаралар жасөспірімдердің құқықтық мәдениетін арттырып қана қоймай, олардың қауіпсіздікке деген жауапкершілік сезімін қалыптастыруға да ықпал етеді.
