Абай облысының полицейлері «ізін суытпай» қаруланған ер адамды ұстады, – деп хабарлайды Polisia.kz.
29 қазанда Қ.Батыр көшесі мен Шәкәрім даңғылының бойында Семей қаласы ПБ Жедел басқару орталығының камералары арқылы қаланың орталық бөлігінде жоғары жылдамдықпен жүрген күдікті көлік көзге түседі. «Барыс-10» патрульдік экипажы автокөлікті қуып жетіп, нәтижесінде полицейлер «ізін суытпай» қаскүнемдердің көлігін ұстайды. Көліктен шыққаннан кейін ер адамдардың бірі мылтық тәрізді затты бұталар жаққа қарай лақтырып жібереді.
Жедел-тергеу тобы тапаншаға ұқсас затты, сондай-ақ 4 патронды тәркіледі. Сараптама көрсеткендей, зерттеуге берілген зат атуға жарамды атыс қаруы, ал патрондар – оқ-дәрілер.
Қазіргі уақытта оқиғаға қатысы бар барлық адамдар анықталды. 36 жастағы ер адамға қатысты ҚР ҚК 287-бабы 3-бөлігі бойынша (Атыс қаруын (тегiс ұңғылы аңшылық қаруынан басқа), оқ-дәрiлердi, жарылғыш заттарды немесе жарылыс құрылғыларын заңсыз иемдену, беру, өткiзу, сақтау, тасымалдау немесе алып жүру) сотқа дейінгі тергеу басталып, уақытша ұстау изоляторына қамалды. Жүргізушіге қатысты жол-қозғалыс ережелерін бұзғаны үшін 7 әкімшілік хаттама толтырылды.
