Алматы полициясы генерал Ахмадиннің 85 жас мерейтойын атап өтті, – деп хабарлайды Polisia.kz.
Марапаттары мен сіңірген еңбегін параққа тізуге келмейтін, КСРО ІІМ еңбек сіңірген қызметкері, әділет генерал-майоры Әлімжан Ахмадиннің 85 жылдық мерейтойы Алматы ПД-да аталып өтті.
Туған күн иесін құттықтау рәсіміне ҚР ІІМ, Алматы қалалық ПД басшылығы, Әлімжан Ахмадиннің туған-туыстары, ІІО-ның ардагерлері мен әріптестерінен 200-ге жуық адам қатысты.
– Құрметті Әлімжан Ахмадин! Көп жылғы жемісті қызметіңіз үшін ішкі істер Министрлігінің атынан және жеке өз атымнан алғыс айтамын. Деніңізге саулық, отбасыңызға амандық, таусылмас күш-қуат, ұзақ ғұмыр тілеймін!, – деді Ішкі істер министрінің орынбасары Марат Қожаев.
Туған күн иесіне көптеген жылы сөздер, тілектер мен құттықтаулар айтылды. Сахнаға сыйлықтар әкелініп, дәстүр бойынша шапан жапты.
ПД ансамблінің солистері Әлімжан Ахмадиннің сүйікті әндерін орындады. Әлімжан Ахмадин 1937 жылы 15 қарашада Солтүстік Қазақстан облысы, Сергеев ауданы, Көк-Терек ауылында ауылдық мал дәрігерінің отбасында дүниеге келген.
Полициядағы қызметін Қарағанды қаласында бастаған. Қарағанды облысында 20 жылдан астам уақыт қызмет атқарса, ішкі істер органдарындағы жалпы еңбек өтілі – 40 жылдан асады.
Қазіргі таңда Алматы қалалық ПД Ардагерлер кеңесі Президиумының мүшесі және Қазақстан Республикасы генералдар кеңесінің мүшесі. 10 медальмен марапатталған, оның ішінде “Қоғамдық тәртіпті қорғаудағы мінсіз қызметі үшін”, 1-2-3 дәрежелі “Мінсіз қызметі үшін”, “Еңбек ардагері” және тағы да басқалар.
2022 жылғы 25 қазандағы Республика Күні мерекесіне орай ҚР Президентінің Жарлығымен Әлімжан Ахмадин 2-дәрежелі “Даңқ” орденімен марапатталды.
