Ақтөбе облысында жол апаты салдарынан 6 адам қаза тапты, – деп хабарлайды Polisia.kz
30 шілдеде сағат 23.30-да Ырғыз ауданы Қалыбай аулының манында Самара – Шымкент автожолының 1046-шақырымында жол-көлік оқиғасы орын алды. Адам шығыны бар.
Honda Jazz автокөлігінің 32 жастағы жүргізушісі, Қырғызстан Республикасының азаматы қарсы қозғалысқа арналған жолаққа шығып, Ырғыз ауданының 33 жастағы тұрғынының басқаруындағы Lada Largus көлігімен соқтығысқан.
Жол-көлік оқиғасы салдарынан Lada Largus автокөлігінің жүргізушісі мен 4 жолаушысы алған жарақатынан оқиға орнында көз жұмды. Сонымен қатар, Honda Jazz автокөлігінің жолаушысы ЖКО орнында көз жұмды, сондай-ақ, Honda Jazz автокөлігінің жүргізушісі мен 30 жастағы жолаушысы түрлі жарақаттармен Ырғыз ауылының аудандық ауруханасына жатқызылды.
Аталған факті бойынша ҚР ҚК-нің 345-бабы 4-бөлігі бойынша сотқа дейінгі тергеу басталды.
Ақтөбе облысы Полиция департаменті көлік жүргізушілерін жол қозғалысы ережелерін қатаң сақтауға шақырады.
