Павлодар облысының жедел басқару орталығының қызметкерлері облыс тұрғындарымен үздіксіз байланыста. Мұнда әр қоңыраудың артында адам тағдыры, әр минуттың астарында азаматтардың қауіпсіздігі тұр, - деп хабарлайды Polisia.kz.
Қызметкердің жұмыс күні кезекшілікті қабылдаудан басталады. Кезекшілер ағымдағы жедел жағдай туралы ақпарат алып, құрал-жабдықтардың жұмысын тексеріп, кезекшілікке дайындалады. Бұл қызметте мұқияттылық, сабырлылық және жылдам шешім қабылдай білу аса маңызды.
Орталыққа жол-көлік оқиғалары, құқық бұзушылықтар, отбасылық жанжалдар және басқа да төтенше жағдайлар туралы хабарламалар түседі. Қызметкер қоңырау шалушыны мұқият тыңдап, мән-жайды анықтап, ақпаратты тиісті полиция жасақтарына дереу жеткізеді.
ЖБО мамандары бейнебақылау жүйелері арқылы көшелер мен қоғамдық орындардағы жағдайды да бақылауда ұстайды. Мыңдаған камерадан алынған ақпарат құқық бұзушылық немесе оқиға анықталған жағдайда жақын маңдағы патрульдік полиция экипаждарына жедел беріледі. Осылайша, ЖБО мен полиция жасақтарының үйлесімді жұмысы көмекке мұқтаж азаматтарға дер кезінде жетуге мүмкіндік береді.
Әсіресе шұғыл әрекетті қажет ететін хабарламаларға ерекше мән беріледі. Қоңырау шалушы қобалжып, жағдайды нақты түсіндіре алмаса да, қызметкер сабыр сақтап, қажетті ақпаратты анықтап, дұрыс шешім қабылдауы тиіс.
Жұмыс түнде де тоқтамайды. Қала ұйқыға кеткенде де орталықтағы мониторлар жанып, қоңыраулар қабылданып, жедел жағдай бақылауда болады.
ЖБО қызметкерінің бір күні — ондаған қоңырау, көптеген жедел шешім және адамдарға көмек көрсетуге әзірлік. Көпшілікке көріне бермейтін бұл еңбектің әр сәті азаматтардың қауіпсіздігін қамтамасыз етуге бағытталған.
Әр қоңыраудың артында — адам, әр хабарламаның артында — жауапкершілік.
