Шымкентте «Автомобиль» жедел-профилактикалық іс-шарасы қарқынды өтуде, – деп хабарлайды Polisia.kz.
Шымкент қаласы аумағында ағымдағы жылдың 12 қазанынан бастап «Автомобиль» жедел-профилактикалық іс-шарасы өтуде. Іс-шараның мақсаты – қала аумағында көлік құралдарын жүргізушілердің оның ішінде мемлекеттік белгілері шетелдік көлік жүргізушілерінің көлік жүргізу тәртібін арттыру мен жол-көлік оқиғаларының санын азайту, сондай-ақ жол жүрісі қағидаларын бұзу мен жарақаттанушылықтың алдын алуды қамтамасыз ету, әсіресе мемлекеттік белгілері шетелдік көліктердің қатысуымен орын алатын жол-көлік оқиғалары мен құқықбұзушылықтардың алдын алу болып табылады. Жедел-профилактикалық іс-шараның он төртінші күнінде көлік жүргізушілермен жасалған 9465 әкімшілік құқық бұзушылық анықталды. Оның ішінде, мемлекеттік белгілері шетелдік көлік жүргізушілермен жасалған 555 әкімшілік құқықбұзушылық анықталып, 58 автокөлік арнайы автотұраққа қойылған. Атап айтқанда: ҚР міндетті сақтандыру туралы заңнамасын бұзған – 46 (ҚР ӘҚБтК-нің 230-бабы 2-бөлігі), техникалық байқаудан өтпеген – 36 (ҚР ӘҚБтК-нің 590-бабы 9-бөлігі), ұялы телефон пайдаланған – 15 (ҚР ӘҚБтК-нің 591-бабы), бағдаршамның тыйым салынған белгісіне өту – 16 (ҚР ӘҚБтК-нің 599-бабы) тұлғаға хаттама толтырылды. Сондай-ақ, қозғалыста жаяу жүргіншіге басымдық бермеген – төрт (ҚР ӘҚБтК-нің 600-бабы), қауіпсіздік белдігін тақпау – 37 (ҚР ӘҚБтК-нің 593-бабы 2-бөлігі), авариялық жағдай туындатқан – үш (ҚР ӘҚБтК-нің 606-бабы), көлік құралын мас күйде басқарған – екі (ҚР ӘҚБтК-нің 608-бабы), тиісті құжатсыз басқарған – 25 (ҚР ӘҚБтК-нің 612-бабы 1 және 2-бөлігі), жол бетін ластаған – 81 (ҚР ӘҚБтК-нің 630-бабы 1-бөлігі) жүргізуші анықталған. Өзге де құқық бұзушылықтар бойынша 249 жүргізушіге әкімшілік хаттама толтырылған.
Айта кету керек, іс-шара ағымдағы жылдың 10 қарашасына дейін жалғасын табады.
Осындай іс-шаралар жол-көлік оқиғаларының санын азайтып, алдын алуға септігін тигізеді.
Тәртіп сақшылары жол қозғалысының барлық қатысушыларынан жол жүру ережелерін қатаң сақтауды сұрайды.
