Орал қаласы ПБ Абай Пб криминалдық полиция бөлімшесінің қызметкерлері алаяқтық жасау арқылы ұрлыққа барған күдіктіні анықтап қолға түсірді, – деп хабарлайды Polisia.kz.
Бірнеше адамнан қоңырау шаламын деген желеумен телефондарын сұрап алып, қолды еткен 27 жастағы Орал қаласының тұрғыны ішкі істер органдарының іздеу есебіне алынған еді. Ұрлап қана қоймай, одан әрі сол ұрланған телефон иелерінің атына Халық банк, Kaspi.kz арқылы қомақты сомаларға несие ресімдеп оны айлакерлік құйтырқы амалдармен кәсіпкерлік шоттарға аударып отырған.
Жәбірленушілерден келіп түскен арыздар және олардың сипаттаулары арқылы күдіктінің кім екені белгілі болса да, оның болу орнын анықтау мүмкін болмады. Полиция қызметкерлері жүргізген іздеу іс-шаралары нәтижесінде күдікті Ақсай қаласынан такси арқылы келе жатқан жерінен қолға түсті.
Тергеу барысында оның Ақсай қаласында да автокөлік ұрлағаны, басқа да ұсақ ұрлықтар жасағаны анықталды. Қазіргі уақытта күдікті азаматқа қатысты 10 эпизодтық іс тіркеліп отыр. Күдікті уақытша ұстау изоляторына қамауға алынды.
Аталған фактілер ҚР ҚК-нің 190-бабы (Алаяқтық), 200-бабы (Автомобильдi немесе өзге де көлiк құралын жымқыру мақсатынсыз құқыққа сыйымсыз иеленіп алу) және 188-бабы (Ұрлық) бойынша сотқа дейінгі тергеу амалдары жүргізіліп жатыр.
