Нұр-Сұлтан қаласында жүргізуші куәлігі жоқ жас жігіт мас күйінде көлік айдап келе жатып, автогрейдермен соқтығысты, – деп хабарлайды Polisia.kz.
Жас жігіт жүргізуші куәлігі болмаса да көлік айдап, сағат 00.25-те Құдайбердіұлы көшесінің бойымен «Рено» маркалы автокөлігін басқарып келе жатып, Мүсірепов көшесінің қиылысында көліктің рөліне ие бола алмай, жолды тазалап жүрген автогрейдерге соқтығысқан.
Жол-көлік оқиғасы салдарынан «Рено» автокөлігінің жүргізушісі қалалық ауруханаға жеткізіліп, медициналық көмек көрсетілгеннен кейін үйіне жіберілген.
Медициналық куәландыру қорытындысына сәйкес жас жігіттің жеңіл дәрежелі алкогольдік масаң күйде екені расталды. Сонымен қатар оның көлік басқару құқығын беретін жүргізуші куәлігі мүлдем жоқ екені анықталды.
Әкімшілік соттың шешімімен көлік құралын масаң күйде басқарғаны үшін жас жігіт 20 тәулікке әкімшілік қамауға алынды. Автокөлік коммуналдық тұраққа қойылды.
Ауа райының нашарлауына және көктайғаққа байланысты елорда полицейлері жаяу жүргіншілер мен жүргізушілерге жолдарда мұқият болуды ескертеді.
24 желтоқсанда Нұр-Сұлтан қаласы бойынша 104 жол-көлік оқиғасы тіркелген, онда екі адам түрлі дене жарақатын алған.
