Жамбыл облысы бойынша ҚАЖД басшылығы майдангердің шаңырағына барып, құрмет көрсетті, – деп хабарлайды Polisia.kz.
Ерлік ешқашан ескірмейді! Мәңгілік жауынгерлердің ерлігі, өрлігі ұрпақ жадында! 9 мамыр – Жеңіс күнінде Жамбыл облыстық Қылмыстық-атқару жүйесі департаментінің бастығы Нияз Рыспаев бастаған жеке құрам Б. Момышұлы атындағы Жеңіс паркінде Ұлы Отан соғысында ел үшін от кешкен майдангерлердің рухына тағзым етті.
Мерекеге орай Ұлы Отан соғысының ардагері Генадий Ивановтың шаңырағына барып, майдангерге құрмет көрсетті.
– Жас ұрпақ сіздердің ел тыныштығы жолындағы жасаған ерліктеріңіз үшін бас иеді! Қан майданда қиян-кескі шайқастарда көрсеткен өр рухтарыңыз өлмейді, – деп Нияз Рыспаев 96 жастағы ардагерге сый-сияпатын ұсынды.
Генадий Иванов қан майданға небәрі 18 жасында аттанған. 1945 жылы Жеңіс күнін батыста қарсы алып, елге оралған. Ардагер І Украина майданының 917 әскери бөлімінің 350-ші атқыштар полкінің зеңбіректі-артиллериясы сапында шайқасқан. Елге оралған соң мектепте математикадан сабақ берген.
