Орал қаласында полицейлер жүргізуші куәлігін рәсімдеуге уәде беріп, алаяқтық жасаған күдіктіні ұстады, - деп хабарлайды Polisia.kz.
Орал қаласында полиция қызметкерлері жүргізуші куәлігін рәсімдеуге көмектесуге уәде беру арқылы жасалған алаяқтық фактісін ашты.
Сотқа дейінгі тергеп-тексеру барысында 30 жастағы ер адамның азаматтардың сеніміне кіріп, жүргізуші куәлігін алуға жәрдемдесуге уәде бергені анықталды. Ақшалай қаражатты алғаннан кейін ол уәделерін орындамаған.
Жүргізілген жедел-іздестіру іс-шараларының нәтижесінде полиция қызметкерлері ер адамның алаяқтықтың бес дерегіне қатысы бар екенін анықтады.
Азаматтарға келтірілген жалпы шығын көлемі 1 миллион теңгеден асты.
Аталған факті бойынша сотқа дейінгі тергеп-тексеру жүргізілуде.
Полиция азаматтарды жүргізуші куәлігін алуға, емтихан тапсыруға немесе оны алу тәртібіне өзгедей жолмен ықпал етуге ақшалай сыйақы үшін "көмектесуді" ұсынатын адамдарға сенбеуге шақырады. Бейтаныс адамдарға ақша бермеңіздер.
