Өскеменде ломбард менеджері 12 млн теңгеден астам қаржыны иемденіп алған, – деп хабарлайды Polisia.kz.
ШҚО-ның облыс орталығындағы ломбардтардың бірінде ірі көлемдегі ақша қаражатын талан-таражға салған.
Өскемен қаласы ПБ Үлбі полиция бөлімінің кезекші бөліміне қаладағы ломбардтардың бірінің директорынан өтініш келіп түскен. Ол өзінің қызметкері ойдан шығарылған, сәйкес келмейтін кепіл билеттерін пайдалана отырып, кассадан 12 500 000 теңгеден астам ақшаны иемденіп алғанын айтқан.
Арызды қабылдаған криминалдық полиция қызметкерлері күдіктіні анықтап, ұстаған. Жауап алу кезінде өз кінәсін мойындаған ЖШС-нің 37 жастағы менеджері кінәлі деп танылған, әйел адам полицияға осылайша материалдық жағдайын жақсартқысы келетінін айтқан.
Қаскөйге қатысты ҚР ҚК-нің 189-бабы 4-бөлігі (Аса ірі мөлшерде сеніп тапсырылған бөтеннің мүлкін иемдену немесе талан-таражға салу) бойынша сотқа дейінгі тергеу басталды.
