Павлодар облысы бойынша қылмыстық-атқару жүйесі департаментінің бастамасымен №45 мекеменің қызметкерлері №6 мектептің оқушыларымен телекөпір өткізді, — деп хабарлайды Polisia.kz.
Іс-шараның негізгі мақсаты — кәмелетке толмағандар арасындағы құқық бұзушылықтар мен қылмыстардың алдын алу, өскелең ұрпақтың құқықтық мәдениетін қалыптастыру, өз әрекеттеріне жауапкершілікпен қарауға және заңды бұзудың салдарын түсінуге бағытталды.
Телекөпір барысында жас сотталғандар мектеп оқушыларымен өздерінің шынайы өмірлік оқиғаларымен бөлісті. Олар жіберген қателіктері, ойланбай жасаған әрекеттері, құқыққа қайшы іс-әрекеттердің салдары және бас бостандығынан айырылудың олардың өмірі мен кейінгі тағдырына қалай әсер еткені туралы ашық әңгімеледі.
Кездесу барысында әрбір ойланбай жасалған әрекеттің тек адамның өзіне ғана емес, оның туған-туыстары мен жақындарына да ауыр зардап әкелуі мүмкін екендігіне ерекше назар аударылды. Сотталғандардың шынайы әрі ашық әңгімелері оқушылар үшін маңызды ескерту және заңды бұзудың қандай салдарға әкелуі мүмкін екенін көрсететін нақты мысал болды.
Сонымен қатар мекеме қызметкерлері оқушыларға қылмыстық-атқару жүйесіндегі қызметтің ерекшеліктері, мемлекеттік қызметке орналасуға қойылатын талаптар, сондай-ақ кәсіби және мансаптық өсу мүмкіндіктері туралы ақпарат берді.
Осындай іс-шаралар жастардың құқықтық сауаттылығын арттыруға, заңға бағынатын мінез-құлықты қалыптастыруға және өмірлік жолын саналы түрде таңдауға ықпал етеді.
Өткізілген телекөпір ашық диалог орнатуға және өскелең ұрпақ арасындағы құқық бұзушылықтар мен қылмыстардың алдын алуға бағытталған профилактикалық жұмыстардың маңызды алаңына айналды.
